شوبير يتحدث عن مهزلة في لجنة الحكام

هاجم أحمد شوبير نجم الأهلي السابق مسؤولي الاتحاد المصري لكرة القدم ولجنة الحكام بسبب الصراع بين محمد فاروق وإبراهيم نور الدين على إدارة اللجنة.

وقال شوبير:"في أزمة كبيرة جدا في القائمة الدولية الجديدة من الحكام المصريين عشان عندنا إثنين بيديروا لجنة الحكام وهما محمد فاروق وإبراهيم نور الدين، فاروق الرئيس ونور الدين بيقول أنا المدير الفني فماليش رئيس فهنا ديك وهنا ديك والضحية في الأخر الكرة المصرية لإن المركب اللي ليها ريسين بتغرق".

وتابع:"ما ينفعش الكلام الفارغ ده، كل طرف متمسك بموقفه، وكل طرف أرسل قائمة دولية للاتحاد الدولي لكرة القدم "فيفا" من أجل اعتمادها في الفيفا، وأنا سألت أحد الخبراء فقال لي الاتحاد للدولي فيفا هيبعت يقول يا جماعة بطلوا هزار انتوا الدولة الوحيدة اللي بعتت قائمتين دوليتين في يومين متتالين وده لم يحدث من قبل من أي دولة".

وأضاف:"أقول لكم اللي حصل هو فاروق راح لجمال علام قال له انا هبعت القائمة الدولية فقال له أبعت، تاني يوم إبراهيم نور الدين راح قال له أنا هبعت القائمة الدولية قال له أبعت، اللي أعرفه المفروض اللجنة تجتمع وتستقر على قائمة وتبعتها للفيفا لكن اللي عرفته كمان إن مفيش لجنة اه موجودين بالاسم بس وبيقبضوا".

وأكمل:"على فكرة الموسم هيبدأ خلاص فالأمر صعب جدا كده هنشتغل ازاي بالشكل ده، هما اتنين متجوزين وبيتخانقوا على القائمة أيه الكلام ده يا جماعة".