شوبير ينتقد إدارة الزمالك بسبب صفقة راموس

وجه أحمد شوبير نجم الأهلي السابق انتقادا لمسؤولي نادي الزمالك بسبب صفقة النجم الإسباني سيرجيو راموس.

وقال شوبير في تصريحات إذاعية:"سمعت شوية تصريحات هشام نصر نائب رئيس نادي الزمالك وأنا الحقيقة بتمنى يتم توحيد الخطاب بين المسؤولين هشام نصر وحسين لبيب وكل أعضاء المجلس".

وأوضح:"هاني شكري عضو مجلس إدارة نادي الزمالك قال راموس حاجة جميلة جدا وعظيمة لكن مش جاي الزمالك ومفيش فلوس، بعدها هشام نصر طلع قال: ابني بيقود المفاوضات بنجاح ساحق وهى بس السيولة المالية بس المبدأ راموس موافق والنجم الإسباني عايز ييجي جدا جدا".

وتابع:"معلوماتي الشخصية إن راموس رفض اللعب في أمريكا، وأنا في الحاجات دي بالي طويل جدا جدا فباب القيد في مصر هيغلق يوم 25 أكتوبر فأنا هنتظر من النهارده 3 أكتوبر لغاية يوم 25 وهشوف إيه اللي هيحصل".

وأضاف:"متعيش الناس في وهم رونالدينيو بتاع زمان، كان يتقال هو جاي يا سيادة يا فندم يقول لك اه اتصلنا وخلصنا وفيه حاجات صغيرة بس كده بنخلصها وهو مبسوط وعايز ييجي نادي الزمالك".

وأكمل:"وساعتها طلعت وقلت يا جماعة لو سمحتم نحترم عقول الناس فطلعوا هاجموني وقالوا لي أنت مستخسر رونالدينيو في الزمالك، لا والله العظيم يا جماعة مش مستخسره ونفسي ييجي ويلعب معاكم، بس فيه كلام بالعقل يعني فأنا هستنى ليوم 25 وهشوف القصة شكلها إيه هل نجل المهندس هشام نصر هيقدر يقنع راموس يلعب في الزمالك تبقى حاجة عظمة العظمة الحقيقة لو حصلت مش بتريق لأ بحق وحقيقي".