إبراهيم سعيد يهاجم إدارة الزمالك بسبب الزي الجديد

وجه إبراهيم سعيد نجم الأهلي السابق هجوماً على إدارة الزمالك بسبب تشابه زي الفريق الأبيض مع زي نادي المصري البروسعيدي الموسم الماضي.

وقال إبراهيم سعيد عبر قناة "النهار":"شركة الملابس الرياضية اللي تعاقد معاها نادي الزمالك، كانت متعاقدة مع النادي المصري البورسعيدي الموسم الماضي، ودي حاجة غريبة جدًا معرفش إزاي عدت على مسؤولي الفارس الأبيض أو لجنة الكرة، أو المجلس".

وأضاف:"تيشيرت المصري الموسم الماضي وتيشيرت الزمالك هو هو، مفيش حاجة اتغيرت غير الطباعة، والنادي المصري فسخ التعاقد مع الشركة دي بسبب خامة التيشيرت".

وأكمل:"نفس التيشيرتات اتبعتت لـ نادي الزمالك، حاجة غريبة جدًا، ده ينفع اتشال اللوجو واتحط لوجو الزمالك، كل شيء زي ماهو ماعدا الشعار".

وأردف:"مفروض كان يتاخد رأي كابتن الفريق مع مدير الكرة، عشان يشوفوا الخامة بتاعت التيشيرت، عشان اللعيب اللي هيلبس التيشيرت فلازم يبقى مرتاح فيه".

وأتم:"مينفعش نادي الزمالك تعدي عليه كده، والشركة تاخد تيشيرتات نادي المصري تديها للزمالك، الأخطاء دي ممكن تحصل مع أندية صغيرة ولكن مش من نادي كبير زي الزمالك".