أحمد مجدي يكشف كواليس صادمة بشأن رحيله عن الزمالك

أعلن أحمد مجدي، لاعب نادي الزمالك الشاب، عن تفاصيل مدوية وصادمة تتعلق بآلية إبلاغه بقرار رحيله الفوري عن صفوف الفريق الأبيض، بعد الاستغناء عنه وبعض اللاعبين الشباب بشكل مفاجئ مثل أنس وائل.

وكتب أحمد مجدي عبر حسابه على "انستجرام" بعد قرار الاستغناء عنه: "أنا أحمد مجدي، بقالي 14 سنة داخل نادي الزمالك، دخلت النادي وأنا صغير بعد ما روحت الاختبارات، وعملت أكثر من 10 اختبارات في كل مرة كنت بروح وأنا عارف إن ممكن أمشي، لكن كنت واثق في ربنا والحمد لله اتقبلت من غير أي واسطة، وطول عمري في الكورة، لا كان ليا واسطة ولا اعتمدت على أي حد غير توفيق ربنا ثم مجهودي".

وأضاف: "خلال الـ 14 سنة لعبت في كل المراحل السنية، وتشرفت بتمثيل منتخب الشباب، واتصعدت للفريق الأول مع جوزيه جوميز، لكن للأسف، قبل القيد بأيام قليلة، اتبلغت إني مش هكمل مع النادي".

وأكمل: "الموسم اللي فات فجأة اتقال لي إن عندي مشكلة صحية ومحتاج أعمل إشاعات، رغم إني عمري ما اشتكيت من أي حاجة، ولا حسيت بأي أعراض، فضلت حوالي 6 شهور بعمل فحوصات وإشاعات بسبب حاجة في الآخر طلعت مش موجودة أصلا، وضاع عليا موسم كامل كنت مستنيه عشان أثبت نفسي مع الفريق الأول".

وتابع: "في النهاية، قدمت تقرير من رئيس قسم القلب بجامعة القاهرة، وهو نفس الدكتور اللي النادي طلب مني أكشف عنده، وأكد إن حالتي سليمة تمامًا، ومفيش أي مانع من ممارسة كرة القدم".

واستكمل: "ورغم كده النادي رفض أكثر من عرض جالي من وقت تصعيدي للفريق الأول، وكان دائمًا الرد إن إنت ابن النادي ومستقبل النادي".

وأشار:"وطول فترة الإجازة كنت بتواصل مع النادي عشان أعرف موقفي، ولو مفيش نصيب كنت أشوف مستقبلي في مكان تاني قبل ما الأندية تقفل قوائمها، لكن في كل مرة كان الرد إني مستمر مع الفريق، ورفضت كل العروض التي أتت لي".

وأوضح: "طول عمري ما اشتكيت من أي حاجة، ولا اتكلمت عن الفلوس، رغم إن كان بيعدي شهر أقبض وعشرة لا، وكانت والدتي هي اللي بتصرف عليا لحد دلوقتي".

وأتم: "اللي مزعلني مش قرار الرحيل لأن دي سنة الحياة في كرة القدم لكن اللي وجعني هي الطريقة والتوقيت، بعد 14 سنة من الانتماء والإخلاص للنادي.. حسبي الله ونعم الوكيل".