أكد محمد أحمد سلامة رئيس نادي الاتحاد السكندري أن النادي الأهلي رفض الحصول على أي مقابل مادي نظير إعارة اللاعب محمد مجدي أفشة.

وقال محمد أحمد سلامة عبر برنامج "النجوم فى رمضان" عبر إذاعة "الشباب والرياضة": " صفقة أفشة معملتش مشاكل فى أوضة اللبس بالاتحاد، كل اللاعيبة بتاخد زي بعض، اللى فرق بس إن الأهلى رفض يأخد مقابل إعارة أفشة، وطلب منح هذا المقابل للاعب تقديراً لدوره مع القلعة الحمراء".

وأضاف: " الصفقات الجديدة فى الاتحاد السكندري غيرت شكل الفريق، وأعادت الثقة لأوضة اللبس اللى اهتزت بسبب تراجع النتائج، علاقتى قوية بكل الصفقات الجديدة، ولمسوا إن كلمتى واحدة أثناء التفاوض".

وقال أيضًا: " محدش يقدر يتخيل الاتحاد السكندري غير في الدوري الممتاز، وعشان كدا تعاقدنا مع صفقات قوية في يناير لإنقاذ الموقف، وأتمنى شراء أفشة وعبد الرحمن مجدى بشكل نهائي بعد انتهاء الإعارة، كل اللاعبين اللى جت في يناير إضافة قوية لزعيم الثغر، وكل الصفقات كانت بالتشاور بينى وبين تامر مصطفى وعبد الظاهر السقا بكل خبراتهم الرائعة".

وتحدث عن رفض محمود كهربا الانضمام للاتحاد قائلًا:" علاقتى قوية بكهربا وهو شايف إنه مش عايز ضغوط جماهيرية في الوقت الحالي عشان كدا رفض الانضمام للاتحاد السكندري.. باركت لكهربا على خطوة إنبى.. هو شايف إن إنبى مناسب ليه حالياً، وأتمنى يقدم أداء متميز كعادته فهو لاعب كبير".