هاجم حازم إمام نجم الزمالك السابق إمام عاشور لاعب الأهلي بعد احتفاله ب "البالونة".

وسجل إمام عاشور الهدف الثاني في مباراة الأهلي أمام سموحة والتي انتهت بفوز الأحمر بهدفين نظيفين.

وخلال احتفاله بالهدف الذي سجله نفخ عاشور بالونًا أبيض ثم قام بدهسه.

وقال حازم إمام عبر قناة "أون تايم سبورت":"موضوع احتفال إمام عاشور بالبالونة مستفز، وبشوف إن هو أكتر واحد هيخسر، وبيحط ضغط على نفسه ومش ذكي".

وأضاف:"إمام عاشور لاعب كويس جدًا لكن مش ذكي ودايمًا بيحط نفسه تحت الضغوط، ودي أصعب حاجة على لاعب الكرة".

وتابع:"الزمالك كان من أسباب شهرة إمام ومعملش فيه حاجة وحشة ولو فكر 1% مكنش عمل كده، لكن أكيد هو لم يفكر في الأمر وإن هيحصل مشكلة (عدت عليه)".

وواصل:"إمام عاشور لو كان رايح الأهلي من حرس الحدود أو المحلة مكنش هيبقى بالنجومية الحالية، ولكن الزمالك السبب في نجوميته".

وأكمل:"عبدالله السعيد مثلا كان جمهور الأهلي غاضب منه جدًا ولكن الناس بتحترمه دلوقتي، لأنه مش بيستفز حد، وعلشان كده بيلعب لحد دلوقتي".

وأتم:"إمام عاشور بيحرج إدارة الأهلي وكابتن محمود الخطيب، من تصرفاته لأن الأهلي مش بتاع الحاجات دي، ومبيعجبهوش الكلام ده".