هاجم الإعلامي خالد الغندور  إمام عاشور لاعب الأهلي بعد تخلفه عن السفر مع بعثة ناديه لتنزانيا لخوض مباراة يانج أفريكانز بدوري أبطال أفريقيا.

وقال الغندور عبر موقع "فيسبوك": " الكبير دايما بيفضل كبير، مهما أتوهم الغلطان إنه هيقلل منه أو هيصغره بالعكس الغلطان هو اللي بيصغر أكتر، نقطة نظام وندخل في الموضوع".

وتابع:"الأهلي هيفضل الأهلي بجمهوره بتاريخه بمبادئه بإداراته اللي بتشتغل وفق مبادئ المؤسسات وأهم مبادئ المؤسسات إن الأشخاص زائلون والمؤسسة هي الباقية بمبادئها عشان كدا بنشوف أهلي الفريق مرتجي هو أهلي صالح سليم هو أهلي حسن حمدي هو أهلي محمود طاهر وهو هو أهلي الخطيب".

وأضاف:" عشان كدا الأهلي كبير وهيفضل كبير، ناس كتير غلطت الأهلي لما اتعاقد مع إمام عاشور عشان موضوع الأغنية إياها في ماتش الشباب والناس دي غلطانة لأن الاحتراف قايم على الثواب والعقاب إمام أخطأ واتعاقب واعتذر وراح الأهلي وأدى أداء عالي جدا ولما أخطأ .. اتعاقب لكن الغلطة الأخيرة كبيرة أوي أوي أوي يا إمام فكك من الفلوس والعقود والإدارة فين انتمائك للجمهور ولزمايلك في الملعب نفسي أعرف فين دماغك وأنت بتتخلى عن فريقك وهو مسافر تنزانيا يلعب ماتش في أهم بطولة للأهلي وجمهوره؟".

وأكمل:" بالمناسبة يا إمام الأهلي .. الكبير  مش هيقف عليك ومحدش هيخسر زيك وأول خسايرك العقوبة التاريخية خصم مليون ونص وإيقاف خمس ماتشات لكن الخسارة الأهم  هي صورتك قدام الجمهور اللي غير رأيه فيك عشان خاطرك وصورتك قدام الإدارة اللي أكرمتك وقدرتك وصورتك قدام زمايلك في الملعب".

واختتم الغندور:" في النهاية لن يصح إلا الصحيح وغلطة الشاطر بألف والغلطة يا نجم لما تكون في حق كيان عظيم معروف بمبادئه وصرامته مش بتكون بألف بس لاااااا ياريت تعيد حساباتك يا إمام وعايز تقعد وتكمل .. يبقى تعتذر وتلتزم ولو عايز تخرج .. فيبقى تعتذر برضه وترضخ لناديك وتحترم عقدك وتخرج من الباب الكبير لكن مش معقول  كل كام سنة تبيع الناس اللي بتشتريك ، شابوو للنادي الأهلي".